Երկրաբանի օրվան նվիրված միջոցառմանը ԲԸՏՄ-ն և Հայաստանի երկրաբանների միությունը ստորագրել են համագործակցության հուշագիր

Այսօր Բնապահպանության և ընդերքի տեսչական մարմնի ղեկավար Հովհաննես Մարտիրոսյանը մասնակցել է Երկրաբանի մասնագիտական տոնին նվիրված հանդիսավոր միջոցառմանը, ներկա էին նաև ՀՀ օրենսդիր և գործադիր մարմինների ներկայացուցիչներ։

Միջոցառման շրջանակներում Տեսչական մարմինը և Հայաստանի երկրաբանների միությունը ստորագրել են համագործակցության հուշագիր։ Փաստաթուղթը նպատակաուղղված է ընդերքի պահպանության և ողջամիտ օգտագործման ոլորտում վերահսկողական մեխանիզմների հզորացմանը, ինչպես նաև մասնագիտական ներուժի առավել արդյունավետ կիրառմանը։

Տեսչական մարմնի ղեկավար Հ․Մարտիրոսյանն իր ելույթում շնորհակալություն հայտնելով երկրաբանների բարդ ու պատասխանատու աշխատանքի համար՝ ընդգծել է, որ երկրաբանությունը մեր պետության տնտեսական անվտանգության և շրջակա միջավայրի կայունության հիմնասյուներից է։ Շեշտել, որ համաչափ ընդերքօգտագործումն ու բնության պահպանությունը հնարավոր է ապահովել միայն պետական մարմինների և մասնագիտական կառույցների սերտ համագործակցության ու գիտականորեն հիմնավորված մոտեցումների շնորհիվ։

ԲԸՏՄ ղեկավարը նշել է, որ ստորագրված հուշագիրը գործնական հիմք է ստեղծում տեսչական վերահսկողության որակի բարձրացման համար, մասնագիտական միության փորձագիտական ներուժի ներգրավումը թույլ կտա իրականացնել առավել թիրախային և գիտահենք վերահսկողություն ընդերքօգտագործման ոլորտում՝ նպաստելով բնական պաշարների օրինական և արդյունավետ կառավարմանը։

Միջոցառման ավարտին ոլորտի մի շարք լավագույն մասնագետներ արժանացել են պատվոգրերի և շնորհակալագրերի։